Мадӕлон ӕвзаг мадау адджын у!

Ирон зӕлланг ныхас,

Дау айс мӕнӕй,

Уӕд баззаин къуырма ӕмӕкуырмӕй.

Нигер.

Ӕцӕгӕлон ӕвзагыл адӕймаг зонды мӕсыг нӕ самайдзан… Уый хъуыды кӕнгӕйӕ 15.05.2019 – 21.05.2019 не скъолайы ацыди ирон ӕвзаджы радон къуыри. 15 майы 1899 азы мыхуыры рацыд Къостайы ӕнӕмӕлгӕ чиныг «Ирон фӕндыр». Уыма гӕсгӕ къорд азы разма республикӕйы хицауады уынаффӕма гӕсгӕ официалон ӕгъдауӕй нымад ӕрцыд Ирон ӕвзаджы бӕрӕгбоныл.

Нӕ къуыри райдыдта беседӕтӕй ӕппӕт кълӕсты дӕр. Ахуыргӕнджыты раныхасы темӕ уыд: «Ирон ӕвзаджы уавӕр ӕмӕ ахадындзинад». Бӕӕгбонмӕ уагъд ӕрцыд къулыгазет цымыдисаг ӕрмӕджытимӕ ирон ӕвзагӕй, нӕ дуг ӕмӕ не гъдӕуттӕй.

17.05.2019 ацыди традицион конкурс ӕмдзӕвгӕтӕ аив кӕсынӕй «Цӕй, ӕмӕ нӕ бӕрзонд Ирӕй, Нарты ӕвзагӕй ӕрдзурӕм ныр». Конкурсы архайджытӕ дихгонд ӕрцыдысты сӕ кармӕ гӕсгӕ ӕртӕ категорийыл. Уӕлахиздзаутӕ систы:

1 -4 къл: 1 бынат – Тыбылаты А.(4 «Б»), 2 бынат- Джыбылаты З. (2 «а»), 3 бынат- Дзгойты Ф.(2 «а)

5 -7 къл: 1 бынат – Айляраты Я. (6), 2 бынат – Дзгойты С.(5 «а»), 3 бынат – Байаты Л. (6)

8 –11 къл: 1 бынат – Котаты Л.(11), 2 бынат – Марзаганты М. (10), 3 бынат – Тотраты А. (11)

4 «а» къласы (ахуыргӕнӕг Гӕздӕнты А.Н.) ацыд гом мадзал «Мӕ уарзон мадӕлон ӕвзаг». Сывӕллӕттӕ аив дзырдтой ирон поэтты ӕмдзӕвгӕтӕ. Ӕвдыстой ирон уацмыстӕм гӕсгӕ сценкӕтӕ. Ныхас цыд Ирыстоны ӕгъдауыл ома ирон сывӕллӕтты хидарыны фӕткыл.

Темыраты Г.Г. скъолайы ӕппӕты кӕстӕр кары сывӕллӕттимӕ бацӕттӕ кодта гом мадзал «Кӕд дӕ ирон, уӕд дзур иронау». Сабитӕ аив дзырдтой ирон ӕмдзӕвгӕтӕ, ӕмбисӕндтӕ. Равдыстой сценкӕтӕ, кӕцыты ахуыргӕнӕг йӕхӕдӕг дӕр архайдта.

Ацы аз Къостайы азыл нымад кӕй у, уымӕ гӕсгӕ 9 кълӕсты (ахуыргӕнӕг Кочысаты Л.К.) арӕзт ӕрцыд викторинӕ Къостайы сфӕлдыстадмӕ гӕсгӕ.

6-7 кълӕсты ахуыргӕнинӕгтӕ (ахуыргӕнджытӕ Кочысаты Л.К., Хъараты Ф.И.) сӕмбӕлдысты Брейн – рингыл. Йӕ темӕ «Нарты фӕткъуы». Ахуыргӕнинӕгтӕ равдыстой хорз зонындзинӕдтӕ сӕ кармӕ гӕсгӕ Нарты кадджытӕй.

19 майы хистӕр кълӕсты ахуырдзаутӕн уыдис цымыдисаг фембӕлд хъӕуы Стыр Ныхас ӕмӕ сылгоймӕгты Советы уӕнгтимӕ. «Нӕ дуг ӕмӕ не гъдӕуттӕ», ахӕм уыд ныхасы темӕ. Хъӕуы карджын адӕм ӕмӕ фӕсивӕды ӕхсӕн ӕрцыд ӕхсызгон ныхас фыдӕлтыккон цард ӕмӕ ӕгъдӕуттӕ , ӕмӕ абоны цард ӕмӕ проблемӕты тыххӕй. Фӕсивӕды хидарынад ӕмӕ сӕ уӕлӕдарӕсы тыххӕй. Ныхас сӕйрагдӕр цыд Ахъиты Албег, хъӕуы дзуары лӕг Токаты Тотрадз, сылгоймӕгты Советы сӕрдар Алыккаты Лариса ӕмӕ скъолайы директор Тебиаты Батрадзы хъӕппӕрисӕй.

Къуырийы кӕронбӕттӕн мадзал уыд зындгонд поэт Хадыхъаты Фатимӕйы ног юбилейон чиныг «Мӕ дуг»-ы презентаци. Мадзалы цӕттӕгӕнджытӕ Кочысаты Л.К., Хъараты Ф.И. сарӕзтой мидисджын литературон композици поэты цард ӕмӕ сфӕлдыстадмӕ гӕсгӕ. Мадзалы архайдтой 5-11 кълӕсты ахуырдзаутӕ, кӕцытӕ аив ӕмӕ зардиагӕй фӕкастысты Фатимӕйы ӕмдзӕвгӕтӕ Фыдыбӕстӕ, мады, уарзондзинады, ирон ӕвзаджы уавӕры темӕтыл. Уазджыты ӕмӕ фысымты размӕ хаст ӕрцыд поэтӕн йӕ дуджы риссагдӕр ӕмӕ бӕллиццагдар фарстатӕ.

Мадзалы размӕ ирон культурӕ ӕмӕ ирон ӕгъдаумӕ куыдфӕндыйы цӕстӕй чи нӕ кӕсы, скъолайыл иузӕрдион чи у, ахӕм хистӕр Дзампаты Артур на кӕстӕртӕн зӕрдӕбын куывдӕй байгом кодта ирон хӕринӕгты ӕмӕ фынгӕвӕрды равдыст.

Мидисджын презентаци саив кодта мадзал.