Балц Къостайы мемориалон хœдзар - музеймœ

Кœфты мœй ныр бирœ азты дœргъы нымад у Къостайы мысœн мœйыл. Æрœджы, поэзи чи уарзы œмœ йœм куыдфœндыйы цœстœй чи нœ кœсы, уыдонœн уыд стыр бœрœгбон. Литературон - музыкалон композиции «Иры œнœмœлгœ гений» œвдыст œрцыд Къостайы музей - хœдзары Дзœуджыхъœуы. Ирон œвзаг œмœ литературœйы ахуыргœнджытœ Хъараты Фатимœ œмœ Кочысаты Ларисœ зœрдиагœй бакуыстой 5 – 11 кълœсты ахуырдзаутимœ Къостайы сфœлдыстадыл. Сывœллœтты аив ирон œмœ уырыссаг ныхасы хъœдыл сœ цœст œрœвœрдтой музейы кусджытœ œмœ уазджытœ. Равдыст тынг схъœздыг кодтой сценикон нывтœ, рагон ирон кœфтытœ œмœ мидисджын презентации. Уœлдай цымыдисагдœр хуынд адœммœ фœкастис уый, œмœ равдысты Къоста йœхœдœг кœй архайдта. Йœ фœлгонц ын тынг аив сарœзта 11 къласы ахуыргœнинаг Тыбылаты Бимболат.

Бимболат йœхœдœг тынг арф œнкъары поэзи, œмœ уый руаджы йœ сарœзт фœлгонц рауадис цымыдисаг. Арфœйы аккаг систы мадзалы архайджытœ Мысыкаты Аслан, Мамсыраты Зœлинœ, Дзгойты Дианœ, Лизœ œмœ Тамарœ, Гулиты Светœ œмœ Дианœ, Колыты Кристинœ, Котаты Лолитœ, Тотраты Аминœ, Джиголаты Динœ, Хадыхъаты Руслан, Гœздœнты Чермен, Зокъоты Тамарœ, Мстиаты Арсен, Цœллагкаты Алан œмœ Цорœты Арсен. Райдианœй кœронмœ амонджытœ Гœздœнты Стеллœ œмœ Хœмыцаты Давид бœрœгбоны уœвджыты зœрдœ œлхœдтой сœ рœсугъд ирон ныхасœй.

Æппœт уыдœтты тыххœй музейы разамонœг Хъесаты Ельзœ зœрдиаг арфœ ракодта скъоладзаутœ œмœ сœ ахуыргœнджытœн. Саккаг сын кодта арфœйы гœххœттытœ œмœ зœрдылдарœн лœвœрттœ - цымыдисаг чингуытœ.