Хъœбатыртœ Ирыстоны нœ мœлынц

Хъœздыг у Ирыстон хъœбатыр лœгтœй. Фыдыуœзœг хъахъхъœнгœйœ ирон лœг фœстœмœ никуы каст, худинаг йœ сœрмœ никуы хаста. Сœ зонд œмœ хъœбатырдзинады фœрцы сœ ном уœлœуыл кœмœн баззад, уыдонмœ хауы нœ хъœуккаг инœлар-булкъон, Советон Цœдисы Хъайтар, зындгонд сгарœг Мамсыраты Хаджумар дœр.

Æрœджы йын хъœубœстœ сœмбœлдысты йœ райгуырды 110-œм азы боныл. Кадджын œмœ зондджын лœг мœрдтœй дœр йœ адœмœн кад у, œмœ уымœн нœ уыд къух бакœнœн хъœуы Культурœйы хœдзары фойе œмœ залы. Бœрœгбонмœ œрцœуджытœ фыццаг базонгœ сты, Республикон архив йœ хицау Нинœ Чиплаковœйы хъœппœрисœй цы хъœздыг равдыст сарœзтой нœ легендарон œмхъœуккаджы тыххœй, уыимœ. Ам уыдысты нœ республикœйы сгуыхт артист Мамсыраты Тасолтан, Цæгат Ирыстоны Хицауады сœрдары хæдивæг Белеккаты Рафаэль, районы администрацийы сœргълœууœджы хœдивœг Къониаты Хазби, районы Ветеранты Советы сœргълœууœг Габеты Семен œмœ иннœтœ.

Дарддœр бœрœгбон хœццœ кодта Культурœйы хœдзары стыр залы. Зал йемыдзаг уыд, фыдœлты фарн œмœ кадœн аргъ кœнын чи зоны, уыцы кœстœр фœлтœр œмœ сœ арфœйаг хистœртœй.

Ахуыргœнджытœ Хъараты Фатимœ œмœ Тыбылаты Бэллœ цы хъœздыг музыкалон - литературон композици сарœзтой мидисджын презентациимæ, уымœн сценœйœ амонœг уыдысты Культурœйы хœдзары режиссер Кочысаты Регинœ, ирон œвзаг œмœ литературœйы ахуыргœнœг Кочысаты Ларисœ, 10 œмœ 11 къласы ахуырдзаутœ Хœмыцаты Давид œмœ Мысыкаты Аслан. Раппœлинаг у, ахуырдзаутœ Колыты Кристинœ, Дзгойты Лизœ, Дзуццаты Вадим, Колыты Аслан, Хохаты Аслан, Тотраты Аминœ, Хœмыцаты Светœ œмœ Казбег, Гœздœнты Давид œмдзœвгœтœ – нœ хъœбатыр œмхъœуккаг инœлары сгуыхтдзинœдтыл дзурœг рœнхъытœ – куыд аив бакастысты, уый. Зœрдиагœй байхъуыстой мысœн изœры уœвджытœ Республикон архивы разамонœг Нинœ Чиплаковœйы цымыдисаг раныхасмœ нœ хъœуккаг хъæбатыр инœлары легендарон цардвœндаджы тыххœй.

Изœр бацœттœгœнджытœн œмœ œрцœуджытœн зœрдиаг арфœтœ ракодтой Мамсыраты хистœртœ, раздœры Æдасдзинады комитеты кусœг Битеты Олег, районœй œрвыст минœвœрттœ. Тыхджын къухœмдзœгъдœй адœм сæмбæлдысты районы Культурœйы галуаны зарœггœнджыты къордыл œмœ лœугœйœ байхъуыстой Хаджумар œмœ Иссœйы зарджытœм.

Тынг саив кодтой изœр Культурœйы хœдзары зарœггœнджыты къорд «Айзœлд» сœ рœсугъд хъœлœстœй. Зарœггœнœг œмœ композитор Хететы Станислав та азарыд, Хаджумарыл нœ хъœуккаг поэт Касаты Батрадз œмœ композитор Кокайты Барис цы ног уацмыс ныффыстой, уый.

Мадзалы кœрон ахуырдзаутœ дидинджыты баст балœвар кодтой цытджын инœлары чызг Мамсыраты Заретœйœн. Традицимœ гœсгœ сывæллæттœ дидинджытœ œмœ веноктœ сœвœрдтой, скъолайы кœрты Хаджумарœн цы бюст œвœрд ис, ууыл œмœ œфсымœрон ингœныл.