04мая2015

Сæ зарæг аскъуыд æрдæгыл

04.05.2015   0 2773

Ивгъуыд къуырийы кæрон нæ республикæйы Национ музейы филиал, Советон Цæдисы дыууæ хатты Хъæбатыр Плиты Иссæйы Мемориалон хæдзар-музейы байгом равдыст «Зæххыл рæстагон хæст цыдис». Арæзт æрцыд Хетæгкаты Къостайы номыл Ирон литературæйы музей æмæ РЦИ-Аланийы Фысджыты цæдисы хъæппæрисæй. Равдысты фæдыл тематикон мадзалы архайдтой нæ республикайы Ветеранты советы минæвæрттæ,Фыдыбæстæйы Стыр хæсты архайджытæ, фысджытæ æмæ уыдонимæ мах дæр, Ольгинскæйы атæуккаг скъолайы ахуырдзаутæ, литературон къорд «Дзырды фарн»-ы уæнгтæ сæ разамонæг Хъараты Фатимæимæ. Ацы хæдзар – музейы не скъолайы ахуырдзаутæ уыдысты фыццаг хатт, уымæ гæсгæ сын мадзалы размæ музейы кусджыты хъæппæрисæй арæзт æрцыд зонадон экскурси. Сывæллæттæ федтой легендарон инæлары дзаумæттæй бирæтæ. Стыр цымыдисаг сæм фæкастысты, æфсымæрон Монголийы адæм нæ хъæбатыр æмзæххонæн, Монголийы адæмон хъайтарæн йæ рæстæджы цы националон дзаумæттæ балæвар кодтой, уыдон.

Равдыст кадджын уавæры байгом кодта Фысджыты цæдисы æмсæрдары хæдивæг Агънаты Гæстæн. Уый загъта, зæгъгæ, Фыдыбæстæйы Стыр хæст куы райдыдта, уæд Ирыстоны фæсивæд, стырæй – чысылæй, сыстадысты æмæ фæраст сты тохы быдырмæ сæ Райгуырæн бæстæ хъахъхъæнынмæ. Уыдонимæ бирæ ирон фысджытæ сæ фыссæн систы бæстæ райстой хотыхтæ. Никуы ферох уыдзысты Калоты Хазбийы, Кочысаты Мухарбеджы, Баситы æфсымæртæ Дзаххот æмæ Дзамболаты, Елехъоты Мурат æмæ иннæты нæмттæ.

Мадзалмæ Ольгинскæйы скъолайы ахуырдзаутæ бацæттæ кодтой литературон – музыкалон композици «Сæ зарæг аскъуыд æрдæгыл…». Композици арæзт æрцыд Кочысаты Мухарбеджы æмæ Белеккаты Харитоны сфæлдыстадон бынтæй, уыимæ Харитоны сфæлдыстадмæ афтæ бæстон цæстæй нырмæ ничима æркасти. Композицийы амонджытæ Тотраты Аминæ æмæ Тыбылаты Карина базонгæ кодтой мадзалы архайджыты, ацы дыууæ курдиатджын лæппуйы сфæлдыстадæй нырмæ аууоны цы къухфыст уацмыстæ æмæ хæстон фыстæджытæ баззадысты, уыдонимæ. Ǽрмæджытæ æргомгонд æрцыдысты Ольгинскæйаг поэтæссæ Хадыхъаты Фатимæйы æмæ скъолайы литературон къорды хъæппæрисæй. Ахуырдзаутæ Колыты Аслан, Сокаты Виктория, Кочысаты Дзамболат, Табуты Камиллæ æмæ иннæтæ иттæг аив бакастысты нæ æдзард хъæуккæгты зæрдæбын æмдзæвгæтæ Мамсыраты Миланæ æмæ Джиголаты Динæ та адæмы размæ рахастой Мухарбеджы æмæ Харитоны хæстон фыстæджытæ. Мухарбегæн йæ мæлæты фæстæ йæ поэтикон уацмыстæн сæ фылдæр зарджытæ систы. Героикон хор « Фыдæлты фарн» - ы уæнгтимæ сæ азарыдысты не скъолайы 5- æм къласы ахуырдзау, курдиатджын лæппу, Боцуаты Аслан æмæ нæ хъæуы культурæйы хæдзары зарæггæнджытæ къорды разамонæг Хететы Станислав.

Нæ ахуырдзаутæ стыр зæрдиагæй сæмбæлдысты Цæгат Ирыстоны Фысджыты цæдисы уæнгтыл. Цымыдисаг сын уыдысты филологон наукæты кандидат Хозиты Барисы, фысджытæ Хуыгаты Сергейы, Дауыраты Дамиры, Дыгъуызты Тенгизы, Рахизфарсы районы Ветеранты Советы сæрдар Гулуты Хизиры æмæ иннæ уазджыты раныхæстæ.

Ирон литературæйы музейы фонды сæргълæууæг Бдайциаты Земфирæ ракуырдта, цæмæй ахуырдзаутæ æмæ сæ разамонæг семæ равдыстмæ цы цымыдисаг æрмæджытæ схастой, уыдон рæстæгмæ уагъд æрцæуой Плиты Иссæйы хæдзар – музейы æмæ сæ арæзт æрцæуа хицæн равдыст.

Нæ фысымты курдиат æхсызгонæй æххæстгонд æрцыд.

Добавить комментарий