Цины хабар

Æхсызгон уавæрты ацыд литературон изæр, кæцы арæзт  æрцыд Ольгинскæйы скъолайы 19- æм мартъийы. Мадзал Дауыраты Зойæ æмæ Сохиты Риммæйы сфæлдыстадмæ гæсгæ бацæттæ кодта театралон къорды разамонæг Калманты Этери йæ хъомылгæнинæгтимæ. Программæйыл архайдтой кæстæр, астæуккаг æмæ хистæр къорды дыууиссæдз сабийы.

Иттæг хорз бацархайдтой сæ равдыстыл. Аив радзырдтой се ̕мдзæвгæтæ, равдыстой миниатюрæ «Нæ дæ ратдзынæн никæмæн уæддæр», театралон архайд аргъауыл «Тъæпп къах æмæ мыстытæ».

     Бæрæгбонмæ хуынд æрцыдысты Дауыраты Зойæ æмæ Сохиты Риммæ сæхæдæг дæр, кæцытæ бæрзонд аргъ скодтой сабиты сфæлдыстадæн. Бафиппайдтой, ахуырдзаутæ тынг хорз кæй дзурынц сæ мадæлон æвзагыл, курдиатджын кæй сты æмæ се ̕хсæн кæй ис фидæны хорз актертæ æмæ фысджытæ. Ахуыргæнджытæ, ахуырдзаутæ æмæ сæ ныййарджытæ тынг æхсызгонæй кастысты равдыстмæ. Се ̕мдзæгъдæй та æвдыстой цины æнкъарæнтæ.